ايمن حميد يعلن مغادرة “البشير شو”.. ويكتب رسالة مطولة

يس عراق: بغداد

اعلن مغني الراب والممثل ايمن حميد، احد اعضاء برنامج “البشير شو”، مغادرته العمل مع كادر البرنامج، فيما كتب رسالة مطولة بهذا الشأن.

وقال حميد في تدوينة على حسابه في فيسبوك ورصدتها “يس عراق”، إنه “بعد ٣ سنوات من العمل في برنامج البشير شو، وصلنا لنهاية الرحلة، واليوم آني أعلن عن خروجي من البرنامج”.

واضاف: “أشتغلت بهذا البرنامج العملاق كاتب ومُمثل ومُغني راب، وگدرنا آني والفريق نحقق هواي انجازات، فخور جداً بيها.. وتعلمت هواي أمور من الكل مستحيل أنساها”.

ووجه رسالة إلى كادر البرنامج قائلا: “آني فخور لاني چنت وياكم! شكراً على الأشياء اللي قدمتوها رغم الظروف، احنا أغلبنا تاركين أهلنا وعايشين بالغربة علمود نحچي براحتنا، تحملنا ضغوطات أكبر من أعمارنا، ضغوطات ما يعرفها غير الكادر، لكن احنا شُجعان، گدرنا نواجه ونحچي ونصنع ونبدّع ونتحدى الدنيا كلها، وصنعنا من الماكو اكو، وحيل فخور لان حققنا هواية نجاحات سوية، فخور بيكم وبمعرفتكم وبالأيام كلها.. اتمنالكم التوفيق أخوتي بمسيرتكم المهنية.. وأتمنى نلتقي مرة ثانية بظروف أحسن”.

فيما وجه رسالة اخرى الى المتابعين، قائلا: “آني اشكركم لأن چنتوا ولا زلتوا سند حقيقي، شكراً على كُل كلمة گلتوها، شكراً على كُل رسالة دزيتوها شكراً على كل صورة صممتوها، ببساطة.. شكراً لانكم موجودين! احبكم هواية وافرح بكُل الأشياء اللي تسووها، واتمنى التقي بيكم واحد واحد وأشكركم، ولابد أن يتغير الحال ونتلاگة! الدنيا صغيّرة، أتمنى تكونون راضين عن الأشياء اللي قدمتها.. أحبكُم”.

وختم حميد: “بالنهاية.. ما أعرُف ورة البرنامج وين راح تكون رحلتي، أكيد راح أزودكم بالتفاصيل كلها ، تمنولي التوفيق

أخوكم أيمن حميد”.

ولاقت رسالة حميد ردود فعل مختلفة من قبل المتابعين، رافضين فكرة مغادرته، معتبرين ان خروجه “خسارة للبرنامج”.