لكل من يقتل شبابنا.. علي جواد

كتب: علي جواد

لكل من يقتل شبابنا.. أقول:

عفية خوية.. سَلِمت يمينك.. باسلٌ ومغوارٌ أنتَ..

لأن لازم نصفي هذا البلد من هذولي الشباب..!!

على أي اساس يطلع هذا الشاب بهالبرد حتى يطالب بحقه، وبحقك؟!!

على أي اساس يعيش هذا الشاب بعراق ما بيه خراب وفساد وقمع وقتل؟!

لأن على أي أساس يكطعون الشارع (بطريقة سلمية تعترف بيها المنظمات الدولية)؟!

لأن قطع شارع مثل (سريع محمد القاسم) مو من اختصاص هذولي الأبرياء..!! هذا اختصاص حكومات الخراب، الي يوميا تهدد بأنه جسر محمد القاسم راح يوكع، وكل فترة يغلقوه ويرجعون يفتحوه بدون أي تعديل أو تصليح أو تبليط، وكل هذا بسبب فسادهم..!! والي يصرخ ويتباكى ويقول بأن هذا الطريق الحيوي مهم جدا، ليش ما يطالب بتبليطه؟ وبناء الحاجز مالته؟ حتى يصير عدنا من صدك (طريق سريع حيوي) مثل العالم.. طبعا هاية إحنا مدا نطلب يسوون خطوط سريعة غير هذا، لأن الـ 1000 مليار من 2003 لحد هسة ما تكفي نسوي هيج..!!

هذولي الشباب لازم ترمي عليهم (رصاص حي) حتى تستمتع انتَ والي وراك ببكاء وعويل وصراخ امهاتهم..!!

حتى سلطة القتل تشعر بالزهو وهية تتابع (حفلة القتل) الي دتسويها انتَ، الي غرقت الشارع بدم هذولي الشباب؟!

ما أشبه اليوم بالأمس.. مع الأسف..!!