مدونة.. حمزة غنطوس: تفاصيل لقاء ممثل الصدر والمواجهة مع المتظاهرين

كتب الناشط حمزة غنطوس:

اللي انحچه وي كاظم العيساوي بالاجتماع الاخير،

نزولكم بساحة التحرير كسرايا السلام يوم تنصيب علاوي اجه لحماية علاوي واكو مؤشرات على ذلك.

انتم حالكم حال اي فصيل مسلح بالشارع يكتل بالمتظاهرين وجاي انعاملكم كميليشيا إيرانية،

دخلتوا لساحة التحرير دخله ارهابية ودخلتوا بشرعية الامر بالمعروف والنهي عن المنكر وهذا مو من حقكم اذا انتم تتعاملون وي المشروبات على انو هي ذنب،
فغيركم يتعامل وي “العرگ” مشروب روحي وأيضًا مو من حقكم جلد الناس تحت ذريعة الشرب،

المطعم التركي أيقونة الثورة
فتحويل المطعم التركي من قبلكم الى حوزة صدرية او الى حوزة دينية ويتم تنزيل صور الشهداء منه ويتم تمرير صور الصدريين منه هذا مرفوض وعليكم إرجاع المطعم لنا،

وجود القبعات بالساحات هو اصل الفتنة
والفتنة بدأت منكم مو منا
لذلك انتم مطالبين بسحب القبعات فورًا،

الطلاب تم الاعتداء عليهم من قبل القبعات
نريد اعتذار رسمي وصريح
ومو من حقكم ضرب اي عراقي يهتف ضد مقتدى،

احنا كمتظاهرين ومحتجين للآن
ضد علاوي.
وعلاوي مرشحكم مو مرشح الشعب
وعدنه أدلة على تمرير علاوي من قبلكم وقدمنا نصف الأدلة لكاظم العيساوي
وكيف ترشح علاوي ومنو اللي روج لعلاوي من الصدريين،

صفحتكم اللي يمثلها صالح ساهمت بفتنه
وحرضت على دم وعدنه دلائل على ذالك،

اكو صفحات نخبوية عدكم
شاركت بفتنه وتحريض ضد ناس مختلفين وياكم
واسماؤهم عدنه.
وجمهوركم من خلال الفيسبوك يهدد بالناس،

مقتدى الصدر اذا يگدر يفرز المندسين
فخل يفرزهم بالاسماء ولا يصف محتجو العراق بالارهابيين،

احنه رحنا واجهنا كاظم العيساوي لان جانوا يردون يحصرون اللقاء بس بالخيم الصدرية
وحجينا اللي محد يگدر يواجه بيه جيش المهدي ويحجيه وياهم،

وبالأخير اتفقنا على سحب القبعات بشكل رسمي من الساحات ويتم الاعتذار من كل الطلاب
اللي تم الاعتداء عليهم ،
ويتم تسليم المطعم لنا و تحت أيادي أمينة،