“من نصير اقاليم”.. رسلي المالكي

كتب رسلي المالكي:

من نصير اقاليم:

الاقليم السني: العلم ماله مال ١٩٩١ والنشيد وطنٌ مدا، سياراتهم معليه طكن جيلات البرنو، وابو التسجيلات مالهم حاط بالجامخانة صور صباح الجنابي، واحتمال يطالبون بنقل ابو حنيفة للفلوجة حتى يسوون المولد النبوي بي، خوما يبقه عد الشيعة؟

الاقليم الشيعي: العلم مالهم اخضر فوك واحمر جوة وبالنص ابيض مكتوب بي (هيهات منا الذلة)، النشيد مالهم (اخاف من اعوفك بعد ما اشوفك)، سياراتهم معليه (مو كافي وصلت للعظم ملينا)، ابو التسجيلات حاط صور باسم الكربلائي، واحتمال يطالبون بنقل مرقد العسكريين للكوفة، خوما يبقن عد السنة؟

حدود الاقاليم منا السنة لابسين ملثم، ومناك الشيعة لابسين ملثم، ذوله يشيلون جي سي، وذولاك يشيلون كلاشنكوف (محور ممانعة جا شلون)، ذوله يسمون المنفذ الحدودي (منفذ شرحبيل بن حسنة)، وذولاك يسموه (منفذ اولاد مسلم).

المطارات مال الاقليم السني:
مطار سعد بن ابي وقاص الدولي.
مطار خالد بن الوليد الدولي.
مطار هشام بن عبد الملك الدولي.

مطارات الاقليم الشيعي:
مطار تاسوعاء الدولي.
مطار عاشوراء الدولي.
مطار روح الله خميني الدولي.

القصر الرئاسي مال الاقليم السني صاير براوة، عود بي عمق ستراتيجي عن الشيعة.

القصر الرئاسي مال الاقليم الشيعي بالديوانية، بعد ان لغوا اسم (القادسية) من المحافظة لان ذولاك الجماعة يزعلون.

الاقليم السني يطبون للاردن بلا فيزا.
الاقليم الشيعي يطبون لايران بلا فيزا.

بالاقليم السني تلكه شوارع باسم عبد العزيز آل سعود.
بالاقليم الشيعي تلكه شارعين واللاخ اسم خميني يهلهل.

اليتعارك عالفيس بالاقليم السني يكتبوله (انت ملحد كافر زنديق مرتد).
اليتعارك عالفيس بالاقليم الشيعي يكتبوله (روح تأكد من ابوك).

كاظم الصيادي يحكم بالاقليم الشيعي.
جمال الكربولي يحكم بالاقليم السني.

جيش الاقليم السني مجاهدين يذودون عن القرآن والسُنة.
جيش الاقليم الشيعي مليشيات من حماة المذهب.

هالحجي بغداد هيج شكلها (😊)، لان خلوها حديدة عن الطنطل..

بخيربي كاكا.. الامور تمام يمك؟